1. ಬಾರಯ್ಯ ಗುರುರಾಯನೆ

🙏🏻🌹🪔🌹🪔🌹🪔🙏🏻

ಅಡಿಗಡಿಗೆ ಮಡಿಯ ಹಾಸುತ
ನಿನ್ನಡಿಗೆ ನಮಿಸುವೆ
ನಡೆ ನುಡಿಗಳ ಒಂದಾಗಿಸುತ
ಕೈಜೋಡಿಸಿ ವಂದಿಸುವೆ
ಬಾರಯ್ಯ ಗುರುರಾಯ ಮನೆಗೆ
ಕಾದಿರುವೆ ಶಬರಿಯಂತೆ //

ಕಾಮಧೇನು ಕಲ್ಪತರುವಿಗೂ ಮೀರಿ
ಕೊಡುವ ಕರುಣಾಕರನೆ
ಕಂದ ನಾನು ಏನೊಂದನರಿಯೆನು
ಕರುಣೆದೋರು ಶ್ರೀಹರಿಯೆ
ಕೃಪೆಗೈಯ್ಯುತ ಬಾರಯ್ಯ ಗುರುರಾಯ
ಕೂಗುತಿರುವೆ ದ್ರೌಪದಿಯಂತೆ//

ಅಹಂಭಾವ ಮಮತ್ವಭಾವ ದ್ವಂದ್ವ
ತೊಲಗಿಸು ರಾಘವೇಂದ್ರನೆ
ದೇಹಭಾವವಳಿದು ದೇವಭಾವವಿಟ್ಟು
ಉದ್ಧರಿಸು ಗುರುರಾಯನೆ
ಮಂದಹಾಸದಿ ಬಾರಯ್ಯ ಸ್ವಾಮಿಯೆ
ಸ್ಮರಿಸುತಿರುವೆ ಧ್ರುವನಂತೆ//

ಪರಮ ಪವಿತ್ರ ಪುಣ್ಯರಾಧನೆ ಇಂದು
ಪೂಜೆಗೈಯ್ಯುತಿರುವೆ
ಪರಿಶುದ್ಧ ಅಂತಃಕರಣದಿ ಮನದುಂಬಿ
ದೀಪ ಬೆಳಗುತಿರುವೆ
ಓಡೊಡಿ ಬಾರಯ್ಯ ಶ್ರೀಗುರುರಾಜನೆ
ಅಳುತಿರುವೆ ಕಂದನಂತೆ//

🪔🌹🪔🌹🪔🌹🪔🌹🪔

ಅನ್ನಪೂರ್ಣ ಸು ಸಕ್ರೋಜಿ. ಪುಣೆ