ಮಹಾವೀರ ಜಯಂತಿಯ ಶುಭಾಶಯಗಳು

ಭಗವಾನ್ ಮಹಾವೀರ

ವೈಶಾಲಿ ಎಂಬಲ್ಲಿ ನಿನ್ನಯ ಜನನ
ಹೆಸರಿಟ್ಟರಂತೆ ಶ್ರೀ ವರ್ಧಮಾನ,
ಸಿದ್ಧ-ತ್ರಿಶಲರ ಮುದ್ದಾದ ಸಂತಾನ,
ಜಗಕ್ಕಾಯ್ತು ಶೋಭಾಯಮಾನ

ಗುರುಗಳು ಕರೆದರು ನಿನಗೆ ಸನ್ಮತಿ
ನೀ ಮನುಕುಲಕೆ ತೋರಿದೆ ಸದ್ಗತಿ,
ಭೋಗ ಜೀವನದಿ ತಾಳಿ ನಿರಾಸಕ್ತಿ
ವೈರಾಗ್ಯದ ಬಾಳಿಗೆ ನೀಡಿ ಸಮ್ಮತಿ

ಹನ್ನೆರಡು ವರ್ಷಗಳ ತಪಶ್ಚರ್ಯ
ಅಹಿಂಸೆ, ಸತ್ಯ ಮತ್ತು ಅಚೌರ್ಯ,
ಅಪರಿಗ್ರಹದೊಂದಿಗೆ ಬ್ರಹ್ಮಚರ್ಯ
ಪಂಚಶೀಲ ತತ್ವ ಪೇಳ್ದ ಆಚಾರ್ಯ

ಜೈನಧರ್ಮದ ಕೊನೆ ತೀರ್ಥಂಕರ
ನಿನ್ನ ಶಿಷ್ಯಕೋಟಿಯದು ಗಣಧರ,
ನಿನ್ನಿಂದಲೇ ಲೋಕಕೆಲ್ಲವು ಶುಭಕರ
ನೊಂದು ಬಂದವರಿಗೆಲ್ಲ ಸಹಚರ

ನಿನ್ನಿಂದ ಹೊಸ ಮತದ ನಿರ್ಮಾಣ
ಉಪದೇಶಗಳು ಸರಳ,ಪರಿಪೂರ್ಣ,
ಪಾವಪುರಿಯೊಳಾದೆ ನೀ ನಿರ್ವಾಣ
ತುಂಬಿಕೊಂಡೆ ಜಗವ ಸಂಪೂರ್ಣ

• ~ಎಮ್ಮಾರ್ಕೆ