ಪೆಟ್ಟು ಬೀಳುತಿಹ
ಗುಟ್ಟನರಿಯದೆ ಬಾಳಲಿ
ಸಿಟ್ಟಿನಲಿ ಗುರುಗುಟ್ಟುತ
ಹಪಹಪಿಸಿ ನಿಂದಿಸುವ ಚಪಲ
ಬಿಟ್ಟಿ ಸಿಕ್ಕರೂ ತಿನ್ನಲಾರೆ
ತಟ್ಟೆಯಲಿಟ್ಟ ಅನ್ನದಗುಳಲಿ
ಇಟ್ಟಿರದೆ ನಿನ್ನ ಹೆಸರನು
ಕಾಣದ ಶಕ್ತಿಯಲಿ ನಂಬಿಕೆಯಿರದೆ
ಗಟ್ಟಿಸಿ ಕೇಳುವುದ್ಯಾರನು
ನಂಬಿಕೆಟ್ಟವರಿಲ್ಲ ಮನವೇ

– ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಹಸಿವಿನ ಬಾಧೆ ಅರಿವ ಮುನ್ನ
ಹದವಾದ ಭಕ್ಷ್ಯ ದೊರೆತರೆ
ಬಸಿವ ಬೆವರಿನ ಮೌಲ್ಯ
ಮನಕೆ ಮುಟ್ಟುವುದೆಂತು
ಶ್ರಮದ ಬೆಲೆತಿಳಿವುದೆಂತು
ಕ್ರಮಬದ್ಧತೆಯ ನಡೆ ಕಲಿವುದೆಂತು
ಬೇವು ಬೆಲ್ಲ ಸವಿವುದೆಂತು
ಹೇಳು ನೀ ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ತುಂತುರು ಮಳೆಹನಿಗೆ
ಮೊಗವೊಡ್ಡಿ ನಿಲ್ಲಬಹುದು
ಬೆಳಗಿನ ಕಿರಣಗಳ ಸ್ಪರ್ಶ
ಹಿತವೆನಿಸಲುಬಹುದು
ಮಧುರ ಮಾತುಗಳ
ಹಿತವಾಗಿ ಆಲಿಸಬಹುದು
ಬಿರುಮಳೆ ಉರಿಬಿಸಿಲು
ಕಡುನುಡಿಗಳ ಹಾವಳಿಯ
ಬಯಸುವುದುಂಟೇನು
ಸರಳತೆಯ ಸಾಕಾರ ನೀ ಮನವೇ

– ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಮುನ್ನುಡಿ ಬೆನ್ನುಡಿಯ
ಬರೆವವರು ಯಾರಾದರಾಗಲಿ
ಹಾಳೆಗಳಲಿ ಜೀವ ತುಂಬಿದವರು
ಯಾರಾದರಾಗಿರಲಿ
ಪುಟಗಳ ಮೃದುವಾಗಿ
ತಿರುವಿಹಾಕುವ ಕೈ
ನಮ್ಮದೇ ಆಗಿದ್ದರೆ ಚಂದ
ಎನ್ನುವುದ ಅರಿತಿರುವೆ ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಅರೆಬರೆ ತುಂಬಿದ
ತುಳುಕಾಡುವ ಕೊಡಹೊತ್ತು
ಕುಲುಕುತ್ತ ನಡೆಯುತ್ತ
ಒದ್ದೆಯಾಗಿ ನಿಲ್ಲಲೇಕೆ
ನೀರು ಅಲುಗಾಡದ ಹಾಗೆ
ತುಂಬು ಬಿಂದಿಗೆ ಹೊತ್ತು
ಶುದ್ದ ನಡೆಯಲಿ ನಡೆದರೆ
ಎಂತ ಚೆನ್ನ ಬಾಳೆನುವ ದೇವ
ಭಾವಪೂರ್ಣ ನಮನ ನಿನಗೆ
ಅಡಿಗಡಿಗೆ ನೆನಪಿಸುವ ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಸಮಸ್ಯೆಯೆಂಬುದು
ಗುಡಿಸಲ ಗರಿಯಲಿಲ್ಲ
ಅರಮನೆಯ ಸಿರಿಯಲಿಲ್ಲ
ಸೃಷ್ಟಿಸಿಕೊಳ್ಳುವ ಜೀವನದಲ್ಲಿದೆ
ಹೊತ್ತು ತಂದ ಕರ್ಮಫಲದಲ್ಲಿದೆ
ಹೊರುವ ಜೀವದಲ್ಲಿದೆ
ನಿಭಾಯಿಸುವ ದಕ್ಷತೆ ತರುವ
ಶಕ್ತಿ ನಿನ್ನಲ್ಲಿದೆ ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಎಣ್ಣೆಯಾವುದು ಕಾಳ್ಯಾವುದು
ಯಾವುದರ ಪರಿವೆಯಿಲ್ಲದೆ
ಗಾಣದ ಎತ್ತಿನಂದದಿ
ಮಾನವ ಜನುಮದರಿವಿಲ್ಲದೇ
ಸುತ್ತುವುದೇ ಬದುಕಲ್ಲ
ದುಡಿವುದು ಉಣ್ಣುವುದು
ಗಳಿಸುವುದು ನಿದ್ರಿಸುವುದು
ಸಹಜವು ವಿಶೇಷವಾಗು ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಉತ್ತಮರ ವೇಷ ಧರಿಸಿದಾಕ್ಷಣ
ಶ್ರೇಷ್ಠನೆನಿಸಲು ಸಾಧ್ಯವೇ
ನಡೆ ನುಡಿ ಆಚಾರ ವಿಚಾರ
ಸನ್ನಡತೆಯಲಿ ಪರಿಶುದ್ಧನಾದರೆ
ದೈವತ್ವದ ನೆರಳಲಿ ಹಾಯಾಗಿರಬಹುದಲ್ಲದೇ
ನಟನೆಯಿಂದಲ್ಲ‌ ಮನವೇ

ರತ್ನಾಬಡವನಹಳ್ಳಿ

ಮುಂಜಾವಿನ ಮಾತು

ಒಪ್ಪವಾದ ನಡೆಯಲ್ಲೂ
ಎಡವದೇ ನಡೆವ
ತಪ್ಪೆಸಗದಿಹ ಮನುಜನಿರನು
ತಪ್ಪೊಪ್ಪುವ ಮನಸಿರಲು
ಒಪ್ಪಿಸುವ ರೀತಿಗೊಂದು
ನೀತಿಯಿರೆ ಸೊಗಸಿಹುದು
ಬೆಪ್ಪರಾಗಿಸಿ ಬಾಯ್ಮುಚ್ಚಿಸಿ
ತೆಪ್ಪಗಾದರೇನು ಚಂದ ಮನವೇ

ರತ್ನಾಬಡವನಹಳ್ಳಿ