ಶಿವರಾತ್ರಿ ಮಹಾಕಾಲ

ಕೈಲಾಸದಿಂದಿಳಿದಿಂದು ಭುವಿಗೆ
ಬಂದವನೇ
ಡಮರುಗ ಬಾರಿಸುತ ಬಾಗಿಲಿಗೆ
ನಿಂದವನೇ
ಶಂಭೋ ಹರಹರ ಮಹಾದೇವಾ
ಓಂನಮಃಶಿವಾಯ
ನಿನಗೇನು ನೀಡಲಿ ಕಾಲಾತೀತನೆ
ಬಡವಳು ನಾನು

ಅಜ್ಞಾನಿ ನಾನು ಉಪವಾಸ ಗೊತ್ತಿಲ್ಲ
ಓದಿಲ್ಲ ಕಲಿತಿಲ್ಲ
ಅಧ್ಯಾತ್ಮಿಕಳೂ ನಾನಲ್ಲ ಜಂಬಡಂಭ
ನನಗೆ ಗೊತ್ತಿಲ್ಲ
ಕಾಯಕವೇ ಕೈಲಾಸವೆನುವೆ ಸುಳ್ಳು
ಮೋಸ ನನ್ನಲ್ಲಿಲ್ಲ
ನಿನಗೇನು ನೀಡಲಿ ಮಹಾಕಾಲನೇ
ಬಡವಳು ನಾನು

ಮಕ್ಕಳು ರೈತರು ಉಪವಾಸದಿಂದ
ಸಾಯುತಿಹರು
ಧನವಂತರು ಸಾಹುಕಾರರು ತಿಂದು
ತೇಗಹುತಿಹರು
ಬರಿಮೈಯನಿನ್ನಬಂಗಾರತೊಟ್ಟಿಲಲಿ
ತೂಗುತಿಹರು
ಹೋಗು ನೀ ಅವರ ಬಳಿ ನಾನೇನು
ನೀಡಲಿ ಬಡವಳು

ಭೂಮಿ ಬಾಯ್ಬಿರಿದು ಆಕ್ರಂದನ
ಮಾಡುತಿಹಳು
ಸೂರ್ಯ ಕೆಂಡದುಂಡೆ ಭೂರಮೆಗೆ
ಉಗುಳುತಿಹನು
ಹನಿ ನೀರಿಗಾಗಿ ಪ್ರಾಣಿ ಮನುಷ್ಯ
ಜಗಳಾಡುತಿಹರು
ಶಿವಾ ಜಟೆ ಬಿಚ್ಚಿ ಗಂಗೆಯ ಹರಿಸು
ನಿನಗೆ ನೀಡುವೆ ಎಳ್ನೀರು

ಮಹಾಯೋಗಾಯೋಗ

ಏನು ಯೋಗಾಯೋಗವೊ ಇಂದು
ಶಿವರಾತ್ರಿ ಮಹಿಳಾದಿನ ಇಂದು
ದಿನ ರಾತ್ರಿಗಳೊಂದಾದ ಸುದಿನ

ಶಿವ ಚೈತನ್ಯ ಶಿವೆ ಅವನ ಶಕ್ತಿ
ಶಂಕರ ಸೃಷ್ಟಿಕರ್ತ ಅವಳು ಸೃಷ್ಟಿ
ಅವನು ಈಶ್ವರ ಇವಳು ಸಂಸಾರ

ಸ್ಥಿತಪ್ರಜ್ಞನವನು ಸ್ತುತಿಪ್ರಿಯಳಿವಳು
ನಿರಾಭರಣನವ ಆಭರಣಪ್ರಿಯಳು
ಎಂತಲೇ ಸತ್ಯಂ ಶಿವಂ ಸುಂದರಂ

ಮೌನಪ್ರಿಯನುಮಾತುಗಾರ್ತಿಇವಳು
ಶಾಂತನವನುಉತ್ಸಾಹಭರಿತ ಇವಳು
ಅದಕೆ ಗಂಡುಹೆಣ್ಣು ಸಮಸಮರ್ಥರು

– ಅನ್ನಪೂರ್ಣ ಸಕ್ರೋಜಿ ಪುಣೆ