ಸುಂದರ ಚಿಟ್ಟೆ
**********
ಬಣ್ಣದ ಚಿಟ್ಟೆ ಸುಂದರ ಚಿಟ್ಟೆ
ಗಿಡದಲಿ ಏತಕೆ ಕುಳಿತಿರುವೆ
ಏನನು ಯೋಚನೆ ಮಾಡುತಲಿರುವೆ
ನನ್ನಯ ಬಳಿಯಲಿ ನೀ ಹೇಳು ll

ಹೂಗಳ ಮೇಲೆಯೆ ಕುಳಿತಿಹೆಯಲ್ಲ
ಬಂಧುಗಳೆಲ್ಲ ಎಲ್ಲಿಹರು
ಗಿಡದಿಂದ ಗಿಡಕ್ಕೆ ಹಾರುವ ಚಿಟ್ಟೆಯೆ
ಏನನು ಅರಸುವೆ ನೀ ಹೇಳು ll

ಉದರವು ತುಂಬದೆ ಹಾರಲು ಆಗದೆ
ಬಳಲಿಕೆಯಾಯಿತೆ ನಿನಗೀಗ
ಸಂಗೀತ ಸುಧೆಯನು ಹರಿಸುತಲಿರುವೆ
ರಾಗವು ಯಾವುದು ಹೇಳೀಗ ll

ವೇಗದಿ ಹಾರುವೆ ಜೇನನು ಸವಿಯಲು
ಆತುರವೇತಕೆ ನಿನಗೀಗಾ
ಹಾರುತ ಹಾರುತ ಎಲ್ಲಿಗೆ ಹೋಗುವೆ
ಕಳೆಯುವೆ ಸಮಯವ ನಲಿಯುತ್ತಾ ll

✍️ ಬಿ ಉದನೇಶ್ವರ ಪ್ರಸಾದ್ ಮೂಲಡ್ಕ