ಕರೆಯೋಲೆ

ಶ್ರೀರಾಮ ನೀನೆಂಥ ಕರುಣಾಮಯ
ಮತ್ತೊಮ್ಮೆ ಭುವಿಯಲ್ಲಿ ಬಂದಿಳಿದೆಯ
ಕಟ್ಟಿಹರು ನಿನಗೊಂದು ದೇವಾಲಯ
ಎನಗೂ ಕಳುಹಿದೆಯ ಕರೆಯೋಲೆಯ

ನೀನಂದು ಸೀತೆಯಾ ವಿರಹದಲಿ ನೊಂದಿರಲು
ಸುಗ್ರೀವನಾ ಸೇನೆ ನಿನ್ನ ಬೆಂಬಲಕಿರಲು
ಸಾಗರಕೆ ಸೇತುವೆಯ ಕಟ್ಟೆ ಚಿಂತಿಸುತಿರಲು
ವಾನರರು ಬಂಡೆಗಳ ಹೊತ್ತು ತರುತಿರಲು

ಬಂಡೆಗಳ ಮೇಲೆ ನಿನ್ಹೆಸರ ಬರೆದಿರಲು
ತೇಲಿತಾ ಬಂಡೆಗಳು ಸಾಗರದ ಮೇಲು
ಮರಳಿನಲಿ ಹೊರಳಾಡಿ ನನ್ನ ಬೆನ್ನಿನ ಮೇಲು
ಅಂಟಿದ್ದ ಮರಳನ್ನು ನಡುವೆ ಕೊಡವುತಲಿರಲು

ನನ್ನಂಥ ಅಲ್ಪನಲು ಪ್ರೀತಿಯನು ತೋರಿದೆ
ನನ್ನ ಸೇವೆಯನು ಮೆಚ್ಚಿ ಬೆನ್ನು ನೇವರಿಸಿದೆ
ಜಗಕೆಲ್ಲ ಅಳಿಲಸೇವೆ ಖ್ಯಾತಿ ಎನಗೆ ನೀಡಿದೆ
ನನ್ನ ಬೆನ್ನಿನ ಮೇಲೆ ನಿನ್ನ ವರದ ಹಸ್ತವಿರಿಸಿದೆ

ನಿನ್ನ ದರುಶನಕೆ ಬಾರದಿರುವೆನೆ ದೇವ
ಜೀವಿಗಳೆಲ್ಲ ಪಾಲಿಸಲಿ ನಿನ್ನ ಆದರ್ಶವ
ದುಷ್ಟತನವಳಿಸು ತೋರಿ ನಿನ್ನ ಪ್ರಭಾವ
ನಿನ್ನ ಹಾರೈಕೆ ಕಾಯಲಿ ಜಗದ ಜೀವಿಗಳೆಲ್ಲವ

– ಮಾಲತಿ ಮೇಲ್ಕೋಟೆ