ಮುಪ್ಪಾಗದ ನಗು

ಒಂಚೂರು ನಗೋಣ ಬನ್ನಿ
ಅದಕ್ಕೇನು ಕಾಸಿಲ್ಲ ಅನ್ನಿ
ಹುಟ್ಟಿನಿಂದ ಮುಪ್ಪಿನವರೆಗೂ
ನಗು ನಮ್ಮ ಜೀವ ಸಂಗಾತಿಯನ್ನಿ

ಆರೋಗ್ಯದ ಬಲವರ್ಧನಗೆ
ಸ್ನೇಹದಲಿ ತರುವ ಸಿರಿತನಕೆ
ಉಲ್ಲಾಸದ ಮನಸಿರಲು
ನಗುವಿನ ಅಲೆ ಜಗದಗಲು

ಮುದಿಯಾಗುವ ದೇಹವಿದು
ಕ್ಷಣಿಕದೆಲ್ಲವು ತನ್ನದೆಂಬುದು
ನಗಿಸಿ ನಗುವ ಗುಣ ನಮ್ಮಲ್ಲಿರೆ
ಮುಪ್ಪಾಗದ ನಗುವಿನ ಸೆಲೆಯದು

ಪ್ರಕೃತಿ ದತ್ತ ಕೊಡುಗೆಯಿದು
ನಗು ಅಳುವಿನ ಸಂಕೋಲೆಯು
ನಗುವುದಾದರೆ ಮನಬಿಚ್ಚಿ ನಗು
ದುಃಖ ಮರೆಸಿ ಹಗುರಾಗಿಸುವುದು

ಸಂಭ್ರಮದ ನಗು ಜಯ ಸಾಧನೆಯಲ್ಲಿ
ಪ್ರಕೃತಿಯ ನಗು ಸೂರ್ಯನ ಕಿರಣದಲ್ಲಿ
ಹಾಲುಣಿಸೊ ತಾಯಿಯ ತೃಪ್ತಿಯ ನಗು
ಮುಗ್ಧ ಕಂದಮ್ಮನ ನಗುವಿನಲ್ಲಿ

ಹಾಸ್ಯ ಕಾರ್ಯಕ್ರಮದಲ್ಲಿ ಕಿಕ್ಕಿರಿಸಿದ ಜನ
ಚೆಷ್ಟೆ, ಕಿಟಲೆ ಹರಟೆಯೇ ನಗುವಿನ ಆಭರಣ
ಒಂದು ಕಾಲದಲ್ಲಿತ್ತು ನಕ್ಕು ನಗಿಸುವ ಅಲೆ
ಈ ಕಾಲದ ನಗೆಕೂಟ, ನಗೆಯೋಗದ ಬಲೆ

ಶ್ರೀಮತಿ ಸುಲೋಚನಾ ಮಾಲಿಪಾಟೀಲ, ಧಾರವಾಡ