ಪ್ರಶಸ್ತಿ, ಪದಕಗಳು

ಪ್ರಶಸ್ತಿ, ಪದಕಗಳು ಪಾಷಾಣ
ಪ್ರಶಸ್ತಿಯಾಸೆಗೆ ಮಾರದಿರಿ ಆದರ್ಶ
ಪ್ರಶಸ್ತಿಯ ಗರಿ ಮುಡಿಗೇರಿದೊಡೆ
ಗರ ಬಡಿದವರಂತೆ ತಲೆ ತಿರುಗಿಸುತ್ತಾ
ಅಹಂಕಾರದಿ ತೇಲುವರಯ್ಯ ಗಾವಿಲರು

ಪ್ರಶಸ್ತಿ ಪದಕಗಳ ಪಡೆದ ಪಂಡಿತರು
ಮಾನವೀಯತೆಯ ಹಣತೆ ಹಚ್ಚದೆ
ಹೃದಯವಂತಿಕೆಯ ಸವಿನೀಡದಿದ್ದರೆ
ಬಂದ ಪ್ರಶಸ್ತಿಗಳು ಸಾಗರದ ನೀರಿನಂತೆ
ಬಾಯಾರಿದರೂ ಪ್ರಯೋಜನಕ್ಕೆ ಬಾರವಯ್ಯ

ಭಾವಾಂತರಂಗದ ಕನಸುಗಳನ್ನು
ಅಕ್ಷರದಿ ಹಿಡಿದು ಅನುಭವದ
ನುಡಿಗಳನು ಬಿಳಿಯ ಹಾಳೆಯಲ್ಲಿ
ಮುದ್ರಿಸಿ ಸಿರಿನುಡಿಯ ಗರಿಮೆಯ
ಕನ್ನಡಾಂಬೆಯ ಪಾದಾರವಿಂದಕರ್ಪಿಸಿ
ಕನ್ನಡತಾಯ ಸೇವೆಗೈವ
ಸೌಭಾಗ್ಯವೇ ಪ್ರಶಸ್ತಿ ನೋಡಯ್ಯ

ರಚನೆ: ಇಂದಿರಾ ಲೋಕೇಶ್ , ಹಾಸನ