ದೇವಿ ನಿನಗೆ ನಾ‌ ಚಿರ ಋಣಿ

ನವಮಾಸ ಹೊತ್ತು  ನುಂಗಿ ನೋವ ತುತ್ತು
ಒಡಲ ಕರುಳ ಬಳ್ಳಿಗೆ ಜಗವ ತೋರಿಸಿ
ಮುತ್ತಿನ ಮಳೆಗರೆದು  ಪ್ರೀತಿಯ ಕೈ ತುತ್ತು
ಉಣಿಸಿದ ಜನನಿ ನಾ ನಿನಗೆ ಚಿರ ಋಣಿ

ತಾನು ಉಣ್ಣುವ ಮೊದಲು ನನ್ನಿಯಿಂದ ನನ್ನ
ಕರೆದು ಇನ್ನೂ ಇನ್ನೂ ತಿನ್ನು ತಿನ್ನು ಎಂದು
ಉಣಿಸಿ ತಿನಿಸಿ ಅಳುವ ಅಳಿಸಿ ಮತ್ತೆ ನಗಿಸಿ
ಓದಿಸಿದ ಸಹೋದರಿ ನಿನಗೆ ನಾ ಚಿರ ಋಣಿ

ಕಂಡರಿಯದವನ ಕರಪಿಡಿದು ಕಲ್ಲು ಮುಳ್ಳು
ದಾರಿಯಲಿ ಜೊತೆ ನಡೆದು ಅಳು ನುಂಗಿ
ಮಹಾನಂದದಿ ಬಾಳುತ ಬಾಳ ಬೆಳಗುತಿಹ
ಬಾಳ ಸಂಗಾತಿ ನಿನಗೆ ನಾ ಚಿರ ಋಣಿ

ನನ್ನ ಹೆಗಲೇರಿ ಆಡಿ ಹಗಲಿರುಳು ಕಾಡಿ ಹಾಡಿ
ಬಿದಿಗೆಯ ಶಶಿಯಂತೆ ಬೆಳೆಯುತಿರುವ ಪುಟ್ಟಿ
ಆರತಿಯ ಮಾಡುವೆ ನಾ ಕೀರ್ತಿನೂ ತರುವೆ
ಎಂದ ಪುಟ್ಟ ಗೆಳತಿ ನಿನಗೆ ನಾ ಚಿರ ಋಣಿ

ಅಕ್ಕ ತಂಗಿಯಾಗಿ ಬಾಳಿ  ಸೊಸೆಯಾಗಿ ನರಳಿ
ಮುಳ್ಳುಗಳ ನಡುವೆ ಹೂವಾಗಿ ಅರಳುವಾಗ
ಅಡಿಗಡಿಗೆ ಅಳಿಸಿದವರ ಶಪಿಸಿ ಕ್ಷಮಿಸಿ ಜಗವ
ಮುನ್ನಡೆಸುತಿಹ ದೇವಿ ನಿನಗೆ ನಾ ಚಿರ ಋಣಿ

– ಡಾ. ಗುರುಸಿದ್ಧಯ್ಯಾ ಸ್ವಾಮಿ
ಅಕ್ಕಲಕೋಟ ಮಹಾರಾಷ್ಟ್ರ
ಮೊಬೈಲ್ 9175547259